Då vert Sæbøvik igjen gjort om til trabantby, går det fram av ei pressemelding frå Kurt Henriksen som er ein av initiativtakarane.

Trabant er som dei fleste veit den østtyske «papp»-bilen som vart produsert fram til Berlinmuren fall i 1989. Arrangementet er eit samarbeid mellom Reisebüro Knaack i Oranienburg og Fjord Ferie Hytteformidling på Sæbøvik.

Til no er det meldt på meldt på 18 trabantar og ein Wartburg. Desse stinkande totaktsmaskinane køyrer for eigen maskin heile strekninga frå Tyskland. I tillegg dukkar det opp nokre norskregistrerte trabantar.

Treffprogrammet består mellom anna av fellestur til Hardanger (8. mai) og utstilling i Sæbøvik 10. mai. Då får publikum høve til å bli med på prøvetur i landsbyen, det vert grilling av bratwurst og sjølvsagt Trabant Rally (rebusløp).

Søndag 11. mai blir det utflukt til Husnes Båthamn der trabantane skal stillast ut saman med glinsande båtar frå Bergen Motorbåtforening og frå heile Vestlandet.

Det første treffet på Halsnøy blei arrangert i fjor, og mange hugsar nok Norge Rundt-reportasjen på NRK. I år har den tyske fjernsynskanalen ZDF ønskje om å laga ein serie på fem program frå trabantane si ferd rundt på vakre Halsnøy og Vestlandet.

Meir info på www.trabitreffen2008.de