I ei pressemelding lovar Halsnøy Kloster fleire gode opplevingar før vinteren set inn.

Først ut er «Klosterklang» – eit samarbeidsprosjekt mellom Halsnøy Kloster og Sunnhordland Folkehøgskule. Elevane ved lydlina og lærar Jan Krey har samarbeidd tett med klosterleiar Helen Pettersen om å laga eit «lydspel» til nokre av romma og i tunet på Halsnøy Kloster. «Klosterklang» er arbeidstittelen på elevane sine lydinstallasjonar. Klanglandskapa søkjer å ta publikum med gjennom historia og bruken av romma, heiter det i pressemeldinga.

Onsdag kveld kan dei som ønskjer det få oppleva dette første utkastet av «lydspelet» i skumringstimen. Då vil lydelevane skapa stemning med lyd på klostertunet.

Utstilling

Laurdag 27. september opnar Åsapaletten ei maleriutstilling på Halsnøy Kloster. Maleklubben høyrer heime i Åsane, og dei rundt 30 medlemene møtest kvar 14. dag for å mala saman.

Utstillinga står laurdag og søndag, og nokre av utstillarane vil vera til stades i helga.

Kor-konsert

Laurdag 4. oktober kjem kammerskoret «Gneis» med dirigent Tore Kloster. Koret skal varma publikum med tonar og ord frå norske komponistar og diktarar i programmet «Vestavind». Blant komponistane er Knut Vaage, Per Indrehus og Glenn Erik Haugland, og blant skrivarane finn me Olav H. Hauge, Ragnvald Vaage og Arild Nyquist.