Det var sagt før premieren at det ikkje ville vera noko raud tråd gjennom stykket som varte vel halvannan time. Det var det heller ikkje, men årets russekull frå Kvinnherad vidaregåande skule fekk vist kva som opptek dei. Det var både lokale og internasjonale sketsjar. Men det var nok kanskje dei lokale innslaga som slo best an, sjølv om slaget mellom «gutane» i musikkgruppa «Backstreet Boys» og «jentene» jentegruppa «Spice Girls», var veldig underhaldande og verkeleg fekk latteren til å lausna hos publikum.

Revyen hadde ein litt utradisjonell og roleg start der russepresidenten sjølv ønskte velkomen, men elles var det kanskje ikkje så mange overraskingar. Tema som politi og trimma mopedar, lokalpolitikarar og lærarparodiar høyrer som vanleg med i ein russerevy. Russen leverte bra og energinivået på scena var stigande gjennom heile revyen. Særskilt utmerkte årets russ seg ved vera svært musikalske, og det er verkeleg mange flinke musikarar blant tredjeklassekullet på KVV i 2010. Ein russerevy vel verdt å sjå. Russen har gjort ein god jobb under leiinga til Tonje Solheim som òg gjorde ein flott innsats på scena.