Ingenting greier å stoppa dei 40–50 dansarane som møtest til dans, levande musikk og kaffikos kvar måndag i Kulturhuset Husnes – ikkje eingong OL.

– Vi har det kjempegøy, ikkje minst med tanke på det sosiale, seier Arny Vårdal, ein av veteranane i dansegjengen. Ho vil gjerne ha fleire med.

– Dansegolvet er stort og har plass til mange fleire, lokkar ho.

Magne Hamre støttar henne fullt ut i synet.

– Dette er veldig moro og kan anbefalast på det sterkaste, seier han.

– Framifrå trim og treffstad, legg Åge Valstad til.

Og det er ikkje berre pensjonistar som er velkomne.

– Alderen er ikkje det viktigaste. Vi tek imot alle som vil dansa og ha det moro, seier Arny.

Ein av dei ferskaste på laget er Haldis Ekeland frå Valen. Den danseglade dama søkte til fellesskapet og dansen etter at ho vart enkje.

– Her kan ein koma utan dansepartnar. Alle byr opp alle. Eg gler meg til kvar einaste måndag, strålar ho.

Ut på tur

Danselaget på Husnes har eit tett samarbeid med danselaget i Odda. Husnes-gruppa vert mellom anna alltid inviterte med når Odda-gruppa reiser på sine årlege treff.

– Odda arrangerer helgeturar, førjulstreff på Nå og vårtreff i Røldal. For mange er desse utfluktene høgdepunkt, fortel Arny.

Bak tiltaket, som har halde på i ei årrekkje, står Søral BIL og lokallaget av LHL.