Dei 17 medlemene og 18 aspirantane i skulekorpset ligg ikkje på latsida. I år er det 45 år sidan korpset starta opp i 1965, noko musikantane og styret vil markera skikkeleg. 12. juni drar heile kompaniet av garde til Alfaz del Pi i Spania. Der ventar speleoppdrag på kyrkjeplassen i Althea, på strandpromenaden i Albir, på dei norske skulane i Albir og Alfaz og på helsesenteret Reuma Sol.

Rikhaldig avis

For å kunna reisa til Spania trengst det pengar. Difor har ei gruppe foreldre og nokre musikantar laga ei triveleg og innhaldsrik avis for sal.

– Vi har tenkt på det lenge, men det har ikkje blitt før. No passa det fint å ta med ein del av korpset sin historie i høve 45-års jubileet, seier Gudrun Bjørk Sveinbjørnsdóttir i redaksjonen. Der har ho med seg Mona Herskedal, Greta Johnsen Berg og Øystein Herskedal. Berit Hansen Bjelland har ført soga i pennen. Ho har hatt born i korpset i mange år og sjølv vore leiar i 13. I avisa kan ein òg lesa om Spania-turen, kva korpset elles driv med, kven som er medlem og kvifor. I avisa samanfattar Daniel Hugneson Øvstebø (13) det siste slik:

«Da e kjekt fordi me får venner og drar på turar».

Avisa vil bli selt av foreldre og musikantar på dørene på Valen, Sunde og Husnes.

– Ta godt imot dei som kjem, og kjøp den fine avisa. Det blir til stor glede for kjekke ungar som gler seg til å reisa til Spania, seier Sveinbjørnsdottir.