Heile skulen er i sving med prosjektet som blir til i løpet av nokre hektiske veker. Kort fortalt handlar forestillinga om den vesle jenta Alice som kjem til eventyrland. Der treff ho rare menneske og dyr i ein forvridd røyndom.

Folkehøgskulen vil laga ein makaber, men humoristisk vri på den kjende historia. Elevane har sjølve laga manus, musikk og dans.

– Forestillinga passar best for ungdom og vaksne, fortel Harald Haugland, Alexander Larsen og Solveig Paasche i PR-gruppa.

Dei håpar på full sal under premieren om kvelden, laurdag 20. mars. Etter forestillinga på Halsnøy, skal «Alice i Eventyrland» på turné til Valdres folkehøgskule, Voss folkehøgskule og Fana folkehøgskule.

I tillegg til å skapa blest om forestillinga, jobbar elevane i PR-gruppa med å skaffa sponsorar og å dokumentera førearbeidet i ein film.