Finborud har på kort tid vorte ein populær kunstnar i Rosendal, pressemelder Galleri G Guddal. For halvtanna år sidan hadde han si første utstilling i galleriet. Blå skibilete med ein varme og humor som sjarmerte dei fleste. Vinteren vert òg med på den nye utstillinga, men hovudsøkjelyset vert sett på sommaren – bading, fisking, golf m.m.

Kristian Finborud er fødd i Porsgrunn i 1964, og har arbeidd med grafikk sidan 1988. Dei første åra med litografi, men i 1994 gjekk han over til metallgrafikk og har sidan hovudsakleg jobba med etsing i sinkplater.

Motiva hentar han både frå hav og fjell. Ofte har eit humoristisk preg. Gjerne litt vanskelege situasjonar med ski på beina, eller kanskje eit merkeleg stup frå svaberga ein varm sommardag. På utstillinga i Rosendal vil han òg presentera en serie landskapsbilete. Mange av desse har eit større format og tar utgangspunkt i stader ved havet.

På opninga laurdag vert det musikk av Silje Hveem, fløyte, og Gjermund Fredheim, gitar. Duoen spelar melodiøs og temperamentsfull musikk innan ulike sjangrar, som indisk raga, amerikansk country, argentinsk tango med meir.

Utstillinga står til 22. mai.