Dag Sørensen hadde si første utstilling i Kvinnherad på Husnes i 1994.

– Eg var på den utstillinga og såg då for første gong keramikken til Sørensen. Då var det små vasar med krystallglasur og sterke fargar som prega Sørensen sitt arbeid, fortalde gallerieigar Gøril Guddal under opninga.

13 år

Alt då tok Guddal inn hans produkt til galleriet i Rosendal, og sidan har kunsten til Sørensen selt betre og betre.

13 år seinare har Sørensen flytta til Rosendal, og utviklinga har vore stor innan det han lagar av keramisk kunst.

– No eksperimenterer han med eigne teknikkar og lagar noko heilt anna enn søte vasar, sa Guddal.

Konsert

Noko av det Sørensen lagar er store krukker og musikkinstrument. Desse nytta Eddie Andresen seg av då han opna utstillinga med ein 30 minuttar lang konsert. Han nytta berre Sørensen sine instrument, og fekk eit stort publikum med seg på notane. Andresen trylla fram dei flottaste lydar av både krukker og instrument, til stor glede for eit lyttande publikum.

Takk

Avtroppande næringssjef Knut Førland nytta høvet til å gje kunstnar Sørensen blomar og nokre velvalde positive ord.

– Kulturbasert næring er sterkt i vekst i kommunen. Verksemda til Dag Sørensen er eit strålande eksempel på akkurat dette, og vi set stor pris på etableringa hans i Kvinnherad, sa Førland.

Han rosa og Gøril Guddal for den einaste urbane møteplassen som finst i Kvinnherad i dag.