Det var i slutten av januar det vart meldt om utslepp frå ein gjødseltank ved Omvikeelva. Same dag var lensmann Sigurd Børve og Olav Bratland frå Statens naturoppsyn på synfaring på staden. Nokre dagar seinare starta Bratland ein kontroll langs elveløpet, frå elvemunninga og to og ein halv kilometer opp til gjødseltanken, der utsleppet vart gjort.

Ifølgje fiskeforvaltar Atle Kambestad, har Omvikeelva hatt ei positiv utvikling med omsyn til laks- og aurebestand. Men den kan ha fått ein brå slutt. For meldinga etter inspeksjonen frå naturoppsynet var nedslåande for dei mange som fiskar i denne elva.

– Totalt talde eg 36 daude fiskar, fordelt frå elvemunninga og opp til gjødseltanken, 10 av desse var yngel. Eg skilde ikkje mellom aure og laks i opptellinga. Sidan den daude fisken var fordelt heilt frå elvemunninga og opp til gjødseltanken, kan det vera grunn til å tru at all fiskeproduksjon (alle årskull) på denne strekkja er daud som følgje av utsleppet, skriv Olav Bratland i ein rapport til lensmannen.

Både den dagen utsleppet skjedde og dagen då kontrollen av elva vart gjennomført, var det liten vassføring i elva.

– Då kontrollen vart gjennomført, var elva nærast reinvaska for gjødsel. Det låg igjen litt gjødsel på botnen av elva, der det var rolege kulpar og der det var vegetasjon på steinen i elva, skriv Bratland.

Kontroll

Då representanten frå Statens naturoppsyn gjennomførte inspeksjonen i Omvikeelva, registrerte han fleire gjødselstankar langs og tett inntil elva, samt ved sidebekkane til elva.

– Eg er uroleg for at desse gjødseltankane i framtida kan vera ein trussel for laks- og aurebestanden i Omvikeelva, skriv Bratland i rapporten sin til lensmannen.

Statens naturoppsyn ber om at Kvinnherad kommune no kartlegg gjødseltankar langs elvelaupet, for å vurdera om tryggleiken rundt dei er gode nok i høve til konsekvensane ved eit utslepp.

– Dette bør gjennomførast for å unngå at nye utslepp skal skje, meiner Olaf Bratland.