Dei to plaskar på bademadrass utanfor naustet til bestefar Lars Einar Solheim. Han sjekkar badetermometeret og kan melda om 20 grader i sjøen i Opsangervågen, målt kanskje ikkje så langt under overflata.

Dei vaksne solar seg på brygga og prisar sommarvarmen.

– Eg har målt 29 grader i skuggen heime hos meg, opplyser Lars Einar.

Familien Solheim/Sjo er ikkje dei einaste som har kost seg i sommarvarmen i helga. Sydenvarmen lokka folk ut til badeplassar langs sjøen og ved vatn.

Lunka vatn

Ein ungegjeng lagar liv og lyd på Kvalen i Opsangervatnet. Vatnet er «heilt lunka», og det er kjekkare å bada i ferskvatn enn i sjøen.

I Husnes båthamn var det laurdag over 50 gjestebåtar og mange badegjester, både tilreisande og fastbuande.

Familien Tunes Huse slappar av i Borvik og et ostehorn til lunsj. Dei bur på Sunde, men tar ofte turen opp til den fine badestranda på Røssland. Slik badestrand har ein ikkje på Sunde.

I Herøysund, som kan skilta med ei av dei finaste badestrandene i kommunen, møter me Celina og Alexandra Eikenes Andersen. Dei må ut i sjøen for å kjøla seg ned i sommarvarmen, og forsikrar at vatnet er ganske varmt.

Varmt

Litt kaldare er det nok i Sandvikjo på Halsnøy. Ein veninnegjeng opplyser at dei har målt temperaturen i sjøen til 15 grader. Det forhindrar likevel ikkje jentene å hoppa i sjøen. For på land er det nesten for varmt. Nett som i syden.