I arealplanen er området avsett til byggjefelt, og dagleg leiar i utviklingsselskapet, Asbjørn Soltveit, fortel at tanken er at det i dette området skal byggjast einebustader.

– Det er svært lenge sidan det vart tilrettelagt tomter for einebustader i Rosendal, og vi veit at det er ein del unge folk i distriktet som ynskjer å byggja seg einebustad, men som til no har stått utan tomtealternativ. Difor har vi fått på plass denne intensjonsavtalen med to grunneigarar i området. Feltet ligg på oppsida av riksvegen, og omfattar eit areal litt innanfor avkøyrsla til skogsvegen og sørover mot Rosendal, til saman kring 25 mål. Eg vil tru at dette vil verta eit attraktivt bustadfelt, relativt kort veg til sentrum, og med framifrå utsyn mot fjorden, seier Soltveit.

Arealet oppover lia er temmeleg avgrensa grunna skredgrensa som er sett i arealplanen.

– Men vi ynskjer å få ein geolog til å sjå på området, og eg har då god von om at skredgrensa kan trekkjast litt oppover, slik at byggjearealet kan utvidast noko.

– Kva vert det neste steget i prosessen for å få området tilrettelagt og byggjeklart?

– Vi vil nokså kjapt lysa etter interesserte utbyggjarar, og i aller beste fall vil eg tru at tilretteleggingsarbeidet kan ta til i løpet av første halvår neste år, seier Asbjørn Soltveit, som legg til at Rosendal Utvikling også ser etter sentrumsnære tomter for omsorgsbustader.