Kunde nummer 2500 blei Margit Isaksen frå Husnes, og ho vart tysdag heidra som jubileumskunde hos Kvinnherad Breiband.

Det var svigersonen til den spreke 71 åringen som overbeviste ho om at det ville løna seg å betre både tv- og nettilgangen med innlagt fiber, og i byrjinga av desember bestemte Margit seg endeleg om å bestilla abonnement hos Kvinnherad breiband. Ikkje visste ho då at nett ho blei kunde nummer 2500. No håpar Margit å læra betre korleis ein bruka internett, slik at ho etter kvart kan selja ting som ho produserer via nettauksjonar.

– Symaskinen var lenge min datamaskin. Eg må jo gjera av med alt det eg lagar. Familie og venner blir jo leie av å ta imot, seier handarbeidsentusiasten med glimt i augo.

Eit fullsett pressekorps blei servert kake og kaffi saman med Margit, dagleg leiar i Kvinnherad breiband, Svein Nipen og marknadskoordinator, Arne Torget, heime hos den heldige jubileumskunden. Nokre overraskingar vart det for òg for Margit i høve pakkeløysinga ho har bestilt hos Kvinnherad breiband med store avslag i pris, samt ein eigen PVR opptakar.

– Det er litt av ein presang, ytrar Margit svært så takksam.

Kvinnherad Breiband leverer i dag breiband til om lag 60 prosent av kundemarknaden i Kvinnherad. I tillegg til dei 2500-breibandkundane har selskapet òg 1258 TV-kundar.

– Fleire og fleire eldre vert i dag kundar hos Kvinnherad breiband, og kanskje særskilt for å få fiber-TV, fortel Svein Nipen.