Med Anders Næs og Jonny Furdal i spissen gjekk laget med spelarar frå Uskedalen, Omvikdalen og Rosendal sigrande ut av turneringa. Men det var berre på nippet.

I finalen møtte dei laget «Underdogs», stort sett med juniorar frå Trio, i tillegg var Mats Paulsen og Erling Hansen med på laget.

Finalen var svært jamn, men «Underdogs» tok føringa med eit lekkert hælspark frå Mats Pauslen. Dei unge spelarane på «Underdogs» dominerte til tider stort i den temperamentsfulle finalen, men «Bocca Under» var rutinerte og stod av stormløpet. Reduseringa til 1–1 ordna Jonny Furdal, direkte på frispark.

«Underdogs» var nok nærast sigeren, men dei vart litt for forsiktige framfor mål.

Straffar

Kampen enda 1–1 etter fulltid, og ekstraomgangar måtte til. Begge laga var noko forsiktige i ekstraomgangane og det enda med straffekonkurranse. Anders Næs fekk ikkje ta straffe, etter at han vart utvist ti sekund før slutt.

I den spennande straffekonkurransen, avgjorde «Bocca Under» på den fjerde straffen.

Koseleg

– Stor stas å vinna og kjekt å vera med, sa Anders Næs etter finalen.

Han var imponert over unggutane dei møtte i finalen.

– Her er det mange spelarar som kan nå langt, sa Næs.

Bronse

Rudlen Vel med spelarar stort sett frå Sandvoll tok bronse, etter siger 3–2 over Kongelaget i bronsefinalen. Dei avgjorde ved Robert Handeland etter ekstraomgangar.