Turprogrammet byr på turar for hovudlaget, men òg undergruppene Barnas Turlag, Fjellsportgruppa og Seniorgruppa.

Hovudlaget sitt program startar romantisk med ein par timars måneskinstur på ski i Fjellhaugen den 28. februar, og blir avslutta med ein bretur på Folgefonna, 17. til 19. september.

– Det er erfaringane frå i fjor, med mange avlyste turar på hausten, som gjer at vi avsluttar programmet så tidleg, seier Anne Kari Enes.

Barnas Turlag sitt program startar alt komande sundag med skileik i Fjellhaugen/Grønlia. Det er same dagen som den nasjonale «Kom-deg-ut-dagen». På programmet står ymse leikar i snøen, bålbrenning og grilling.

Fjellsportgruppa byr på program for den som vil ha det glatt, høgt og bratt. Her er alt frå tur på tvers av Folgefonna i mars, til tinderangling i Bjørndalstindane i august.

For dei som kan styra seg for ekstremsport-variantar, byr Seniorgruppa på eit omfattande program. Mellom anna ein spennande 10-dagars tur til Skottland med spaserturar på West Highland Way.