Samarbeidsorganet for bedrifter i Sunnhordland, Atheno, inviterer kvinner inn i det nye nettverket «Kvinnovasjon». Nettverket er mynta på kvinner som anten har etablert eller ønskjer å etablera eigne bedrifter. Målet er å mobilisera og motivera fleire kvinner til å starta eigne bedrifter, til vidareutvikling av allereie etablerte bedrifter og til generelt å engasjera seg meir i næringsutvikling, pressemelder Atheno.

Prosjektleiar Astrid Kjellevold Steinsland har ein begeistra gjeng med seg i prosjektstyret. Ifølgje pressemeldinga er det ikkje småtteri dei ønskjer å oppnå; nettverket tek sikte på å styrkja nyskaping, kreativitet, etablering, motivasjon, inspirasjon, begeistring, iver, kunnskap, leiing, styrearbeid kvinner og nettverk.

Prosjektet er finansiert av Kommunal- og regionaldepartementet og styrt av det statlege føretaket SIVA (Selskapet for industrivekst). Slike nettverk har eksistert i Noreg frå 2006, men kom til Hordaland først i 2010.

Det nye nettverket i Sunnhordland skal byggjast opp i samarbeid med Samarbeidsrådet for Sunnhordland, ei regional prosjektgruppe, Nyskapingsparken i Bergen og næringshagane på Voss, Mongstad og i Odda. Då prosjektet «Kvinnovasjon» starta opp i 2006 var 32% av nyetablerarane kvinner. Målet for 2013 er 40%.

Nettverket startar opp på Stord Hotell 10. februar. Blant førelesarane er Janne V. Solheim, adm. dir i Janus.

– Etablerarar og andre interesserte er velkomne til ein spennande kveld, helsar Atheno.