Dei norske flagga vaia frå skip, verftsområde og heile Løfallstrand-bygda, der skipsdåp framleis er ei høgtidsstund. Og det var all grunn til både å flagga og syngja «Ja, vi elsker», då det tredje skipet av i alt fire som verftet skal levera til Solvik Offshore, vart døypt. Med stø hand knuste gudmor, Madli Sandvik, opphaveleg frå Åkra, champagneflaska mot skutesida.

– Eg døyper deg «Troms Artemis», må hell og lykke følgja deg på alle hav, var helsinga det festpynta skipet fekk med seg frå gudmora.

Tidlegare på dagen hadde skipsreiar Tor Østervold, inspisert det staselege skipet. Slik oppsummerte han den inspeksjonen:

– Eit perfekt produkt. Den beste båten av dei tre de har levert til no, var helsinga frå reiaren.

Som ei ekstra takk til arbeidarane som har utført jobben, hadde reiaren med seg ein sjekk til velferdsklubben ved verftet. Kasserar i klubben, Herbjørg Orholm, kunne ta imot 35.000 kroner til velferdskassen.

Men det var fleire som hadde ein lukrativ dag på verftsområde. Rosendal skulekorps som underheldt med fengande marsjtonar under dåpssermonien, fekk 12.500 kroner i gåve frå verft og reiarlag.

– Dette er sommarbåten vår. Som det vesle verftet vi er, er vi bra nøgde med å ha levert ein slik båt. Vi har gjort denne jobben i løpet av seks månadar, den første brukte vi tre månadar meir tid på, sa ein stolt Øystein Hellesøy under dåpsfesten.

Seinare på kvelden var spesielt inviterte gjester bedne til fest på Rosendal fjordhotell. Laurdag held festen fram med tilstelling for tilsette, underleverandørar, bygdefolk og andre.

Arne Lindeflaten

arne@kvinnheringen.no