Alle gode ting er tre, heiter det. I Kvinnheringen sitt arkiv finn me fleire fine lovnader om ny skilting, men det er framleis dei same skilta som står både på Reset, Opsanger og i Podlen.

? Våren 2009 lova vegvesenet ny skilting innan sommaren same året.

? Våren 2010 håpa vegvesenet at nye skilt skulle vera på plass før Sunnhordland folkehøgskule sin skulestart.

Men også i haust fekk folkehøgskulen bruk for dei heimelaga skilta sine som viste veg til Halsnøy i eit par dagar.

Overingeniør i Statens vegvesen, Heming Lunestad, forstår at einskilde byrjar å bli utolmodige.

– Skiltplanen og endringane er no klare og vi skal senda skilta i bestilling så snart råd er. Då er det leveringstid og montering som står att, seier Lunestad.

Han fortel at dei nye skilta vil fortelja om Halsnøy og Stord i staden for Ranavik og Skjersholmane.

– Kan du seia noko om kva tid skilta kjem opp?

– Nei, nokon dato kan eg ikkje koma med.

– Men blir det i løpet av året?

– Ja, no må vi få dette ut av verda. Eg forstår at folk byrjar å bli utolmodige.