Tidleg i januar i år fekk mange med seg det flotte fyrverkeriet Lars Helge Steinsland sendte opp frå Nebbo på Husnes. Han fekk svært god respons frå folk som syntest det var eit vakkert skode, og vil derfor få til det same på nyttårsaftan.

– Sist gong måtte eg venta til 8. januar med å skyta opp, på grunn av det dårlege vêret på nyttårsaftan. I år håpar eg at alt klaffar, fortel Steinsland, som er pyroteknikar.

Fyrverkeriet han skal skyta opp er kjøpt gjennom eit større importfirma i Oslo, der han også har teke kurs tidlegare. Det blir i år hovudsakleg luftbomber som går mellom 400 og 450 meter opp i lufta og breier seg 200 til 300 meter ut i lufta. Fyrverkeriet kostar opp mot 20.000 kroner.

– I fjor fekk eg fleire lokale sponsorar som gjorde dette felles fyrverkeriet mogleg, og eg trur det var noko som gledde mange. I år har eg også fått med meg nokre lokale sponsorar, men eg skal også ha ei bøsseinnsamling i romjula og håpar fleire vil støtta opp om prosjektet.