Møtet blir i samfunnshuset. Bakgrunnen for møtet er at begge organisasjonane har fått ei mengde «bekymringsmeldingar» frå folk som lurer på kva situasjonen for Rosendalstunet er.
– Ut ifrå det vi kan lesa i lokalpressa er det ikkje rart at folk er forvirra. Innhaldet i oppslaga svingar frå det mest optimistiske scenariet den eine veka til det mest negative den andre veka, skriv dagleg leiar i Rosendal Utvikling, Asbjørn Soltveit, i ei pressemelding.

Kommunalsjef Gunn Tove Petterteig og soneleiar Leif Kolbjørn Kongestøl kjem for å gå gjennom status i dag og framtidige løysingar. Prosjektleiar Magne Øyre vil orientera om den tekniske/planmessige sida av prosjektet.

Arrangørane håpar på fullt hus og stort engasjement under folkemøtet.