Arne Bjørnevik (H) hadde i kommunestyret ei rekkje spørsmål om det planlagde Fjelbergsambandet.

Kommunalsjef Kjell Nygård svara så godt han kunne på spørsmåla om ferjesambandet, men hadde ikkje mykje lysteleg nytt å koma med.

– Dette er ei trist sak. Planane er stoppa svært mange gonger, både av fylkeskonservator og no sist er det Riksantikvaren som ikkje kan godkjenna planane, sa Nygård.

Han forklara at planane har blitt godkjend, for å bli stoppa, så godkjend og stoppa igjen, svært mange gonger.

No står saka med at Riksantikvaren ikkje kan godkjenna planane om ei bru og ei kabelferje, grunna arkeologiske funn. No er det fylkeskommunen som må svara på Riksantikvaren sine meiningar.

– Samstundes så er det slik at medan planane har blitt arbeidd med, så har trafikken over Utbjoa berre gått ein veg oppover. Det har lege i alle planar at dette sambandet skal leggjast ned når ein får Fjelbergsambandet, men no blir det ikkje lett å leggja ned denne ferja, sa Nygård.

– Kanskje blir det eit alternativ å seia at vi må klara oss med ei ferjeløysing i staden for kabelferje og bru, sa Nygård til slutt.