Rundt 100 deltakarar stilte til start i årets kvinnheradsmeisterskap som vart arrangert i Fjellhaugen på laurdag. Strålande sol og flott skiføre gjorde forholda perfekte. Og best av alle var Håvard Pedersen frå Ternen. Han avgjorde duellen med Johannes Hjelmeland etter berre ein kilometer av den 10 kilometer lange løypa.

– Eg følte at Håvard hadde eit litt høgare gir enn meg. I frykt for å stivna på andre runden måtte eg berre sleppa han etter ein kilometer, seier Johannes Hjelmeland som vart toar i rennet.

I fjor spelte dei to fotball saman på Trio, denne sesongen er Johannes tilbake i Rosendal.

Håvard Pedersen brukte i overkant av 29 minuttar på den to ganger fem kilometer lange løypa. Han vann til slutt ein suveren siger, men hevdar at det ikkje skuldast hardtrening på ski den siste tida.

– Nei det gjer det ikkje. Men det er rart med det, når startnummeret kjem på brystet vaknar instinktet. Eg er litt overraska over at det ikkje var fleire som hang på, seier den ferske kvinnheradsmeisteren på ski.

Les fyldig KM-omtale i måndagsavisa.