– Me satsar på å gå til Varhaugselet, smiler venninnene Kristin Storhaug og Marianne Prestnes Ersland, begge frå Sandvoll.

Utgangspunktet for turen var ved Valen sjukehus sitt velferdsbygg. Returen ned til same stad går via Olderbotnen, og i 13.30-tida blir elevane henta med bussar. Turen starta med utdeling av turkort, vassflaske og panneband. Vel nede igjen, vil innlevering av tomflaska gi ytterlegare premiering.

Med unnatak av åttandeklassingane på Hatlestrand, går alle Kvinnherads-elevane på dette trinnet tur i føremiddag. Det vil seia åttandeklassingar frå ungdomsskulane Øyatun, Husnes, Rosendal og Åkra. Målet er Nordefjell, men dei sprekaste går til Varhaugselet. Regien er det Kvinnherad Turlag som står for.

– Opptur er landsomfattande og i alt er det 23.000 fjortenåringar til fjells i dag. Det er tredje gongen Opptur blir arrangert i Kvinnherad, smiler Anne Kari Enes.

Ho er ein av i alt sju frivillige turlagsfolk som har hand om årets Kvinnherad-Opptur.

– Det er kjekt å nå alle i eitt alderstrinn på denne måten, legg ho til.

Det er turlaga sin paraplyorganisasjon, Den Norske Turistforening, som er initiativtakar for den årlege oppturen for åttandeklassingane. Målet er å få fleire ungdommar til å oppleva gleda ved friluftslivet, samt by på ein dag med fysisk aktivitet.

Turlaget sitt bildegalleri frå turen finn du her.