– Det suraste tapet eg har opplevd, stønna Rosendal-trenar Tor Gundersen og sparka drikkeflasker då siste fløytesignal lydde over kunstgrasbanen i Rosendal.

Berre eit par minuttar før putta Djerv inn sigersmålet etter at trøytte Rosendal-bein etter kvart hadde fått problem med å hengja med i svingane.

Noko av det som sat i beina var nok laurdagens hengekamp mot Odda, der Rosendal kapra eit viktig poeng med 1–1-resultat. Også i kampen mot Djerv såg det lenge ut til å bli poengdeling, etter at det stod 2–2 til pause, og nesten heilt til kampslutt.

Tok leiinga

Mot normalt starta Rosendal sterkast og leia 2–0 etter berre 16 minuttar. Line Steffensen Holmedal stod for begge skåringane, men gjestene utlikna i det 36. (frispark) og 37. minutt då heimelaget i ein periode var i overkant gjestfrie. Jentelagsspelar Amalie Fjell Helleland debuterte for a-laget då ho kom innpå i slutten av kampen. Ho gjorde ein god figur. Like etter den fatale 2–3–skåringa til Djerv, fyrte Amalie av eit godt skot, men Djerv-målvakta klarte å avverga.

Laget som endar sist på tabellen rykkjer heilt sikkert ned. Ytterlegare nedrykk er avhenging av opp- og nedrykk til og frå 2. divisjon. Dersom Rosendal klarar å kara seg opp på nest siste plass, kan det altså vera håp om kvalifiseringsspel. (Sjå krinsen sin info om dette her.) Dei to siste rundane blir dermed svært så nervepirrande. Neste kamp er borte mot NBK/Eikanger/Kvernbit – siste kamp er heime mot jumbo-kollega Os!

Tabell og resultat finn du her.