Formelt er det Husnes Pitstop-service og Ronny Teigen som har fått løyvet. Teigen har i tillegg med seg bror sin og tre blad Thorsen – alle sentrale i «Gutta på Rudskogen» som var vignetten for ein reportasje i Kvinnheringen i fjor.

Ronny Teigen er sjølv grunneigar i aktuelle området rundt Skarholmane i Teigen. Der har bilentusiastane rydda ein rundbane på om lag 800 meter med seks meters breidde. Seinast onsdag kveld rydda dei snø i 3–4 timar. I bane-området har Pitstop-gjengen målt isen til å vera mellom 42–47 centimeter, men det er altså kun i dette området dei har målt. Det finst framleis einskilde stader på Opsangervatnet med utrygg is.

– Det litt frosen issørpe på toppen, men hardare is nedover, fortel Teigen.

Organisert

– Køyringa må skje i trygge former og me må difor vera 5–6 personar for å kunna overvaka heile banen. Men sjølv om me har eit opplegg rundt køyringa, må kvar einskild sjåfør ta ansvar både for køyring og eventuelle skader på bil, seier Ronny Teigen.

Løyvet frå kommunen avgrensar køyringa til klokka 20 om kvelden, og det er ikkje lov å køyra om søndagar.

– Bilane som blir brukte må vera registrerte og i godkjent stand, ikkje minst med tanke på støy, understrekar Teigen.

Det er på ingen måte fritt fram – all køyring må skje etter avtale med Ronny Teigen. Skulle nokon ta seg til rette, kan det spolera heile løyvet.

– Vi køyrer maksimalt to bilar i slengen, og dei må halda avstand. Det er ikkje tale om duell-køyring. Eventuell kappestrid handlar om bestetid, seier Teigen.

Hovudføremålet er treningskøyring for miljøet av bilinteresserte.

– Me får testa bilar og dekk. Nokre av bilane har rallypiggar, noko som er ei aha-oppleving samanlikna med piggfrie dekk, fortel Teigen.

Han er takksam for den positive responsen hos rådmann Trond Sætereng og lensmann Sigurd Børve.

– Det er eit bra tiltak no når vi har denne uvanlege vinteren. Slik køyring gir god trening – også politiet har drive med køyretrening på islagte vatn, kommenterer Børve.