Erlend Nymark Jensen frå Trio vart nummer sju av ni på 3000 meter i Ungdomsmeisterskapen (UM) i friidrett i Molde fredag kveld. Det greidde han på tida 9.44, om lag eitt minutt bak vinnaren. Prestisjeløpet kvalifiserte han seg til med tida 9,34 under Sunnhordlandsmeisterskapen tidlegare i sommar, ein prestasjon som låg fire sekundar over kravet på 9.38 og som framleis er persen hans. Det er godt gjort, ikkje minst med tanke på at farten i Trio si friidrettsgruppa ikkje på langt nær er den same som før. Jensen hadde håpa på å setja ny pers i Molde, men slik gjekk det dessverre ikkje.

– Forma er god, og eg hadde satsa på å koma i mål på rundt 9.25. Eg skal ikkje klaga, men vedgår at eg er litt skuffa, seier løparen på telefon frå Molde.

– Kva gjekk gale?

– Kombinasjonen av lett forkjøling og fast dekke på banen. Når ein er vane med grusbanen på Husnes, blir det litt uvant med eit anna underlag, sjølv om det i Molde vert rekna for å vera betre enn vårt, seier Jensen.

UM i Molde er Jensen sin første meisterskap utanfor Sunnhordland, men neppe den siste.

– Det var kjekt å prøva seg i konkurranse med dei beste i landet, men eg må nok trena meir om eg skal klara å hevda meg.