Lenge før startskotet tyder alt på at deltakarrekorden på 1356 trimmarar vil bli sletta med god margin. Årsaka til det er at alle elevane ved Undarheim skule i år blir med for fyrste gongen, fortel Bjørn Heimvik ved BIL Søral.

Søralløpet blir i år arrangert for 26. gong og det er difor ikkje til å undrast over at arrangementet har funne si form, med skuleløp torsdag føremiddag, «oppsamlingsløp« torsdag kveld og hovudløpet søndag føremiddag.

I fjor stilte til saman 1356 opp i dei tre arrangementa. Det var ny rekord og ein fin auke frå året før, m.a. på grunn av at dei eldste elevane ved Undarheim skule deltok. I år stiller altså skulen med alle elevane, saman med elevar og lærar ved Husnes ungdomsskule og KVV.

Dei siste åra har om lag halvparten av deltakarane vore skuleelevar, i år vil det truleg bli fleire elevar enn vaksne.

Med unnatak av dei yngste skuleborna skal alle gjennom den same løypa, som er på 5,8 kilometer og vekslar mellom sti, turveg og asfalt.

For å unngå trafikken på hovudvegen skal dei yngste gå ein runde rundt golfbanen på ca fire kilometer.