Ho er òg song- og fiolinelev i kulturskulen. Stort sett er ho ei smilande og livsglad jente.

– Kva er du oppteken av nett no?

– Russerevyen, både på arrangørsida og som aktør på scenen. Dei siste to vekene vart det øvingar kvar dag. Eigenleg har eg sceneskrekk, men etter mange år som song- og fiolinelev i kulturskulen har det begynt å koma seg. Mykje tankeverksemd går òg med til å fundera på kva slag utdanning eg skal ta. Framleis slit eg med avgjerda.

– Kva får deg sinna?

– Når nokon lir urett, til dømes på skulen. Det likar eg dårleg. Men skal eg vera ærleg, må eg leggja til at eg sjeldan er sint.

– Kva gjer deg glad?

– Å, det er mykje! For eksempel når mamma lagar fiskebollar til middag, eller når kjærasten min ikkje reiser på skitur kvar helg.

– Noko du ser fram til nett no?

– Til å bli ferdig med revyen og til komande skuleturar til Trondheim og Berlin. Og sjølvsagt til russetida som startar 1. mai. Det blir moro.

– Kva er det beste med å bu i Teigen?

– Teigen er ein bra plass som ligg fint til ved vatnet. Dessutan har vi gode naboar, særleg ho over bekken. Det einaste eg saknar er fleire bussavgangar til Husnes.

– Kva er ei god helg?

– Når kjærasten min skippar skituren og blir heime. Å vera saman med veninnene mine set eg òg pris på.

– Held du deg i form?

– Den jobben gjer gymtimane på skulen.

– Kor har du hatt beste ferien?

– Det må vera den til London med familien i 2006. London er ein spennande by. Dette var dessutan første flyturen min, noko som i seg sjølv var spennande.

– Kva er bra med å reisa bort?

– Å koma bort frå kvardagen, oppleva forandring og sjå noko nytt. Å koma heim igjen er òg kjekt.