Olav Ljostveit, 51 år

Yrke: Privat næringsdrivande, Ljostveit Transport

Adresse: Seimsfoss

Sivil stand: Gift, tre born og eitt barnebarn

– Denne sommaren har slett ikkje vore mykje å skryta av vêrmessig. Forsommaren var kald med mykje nordavind, og juli kom med berre ein og annan dagen som likna på sommar, seier Olav Ljostveit, ein kar som skulle vera kjent over heile kommunen som mangeårig leverandør av konsummjølk til mellom anna butikkar, skular og institusjonar.

– Vi har to bilar og leverer mjølk kring om i heile kommunen, bortsett frå i Ølve, fortel han.

– Men har du hatt ferie i sommar?

– Ja, eg har hatt ein 14 dagars tid, og det er faktisk litt i overkant av det vi normalt har kunna unna oss om sommaren. Dei første dagane var vi på hytta til far til kona i Sunnfjord, deretter tok vi ei lita veke på Sørlandet og oppover mot Stavanger. Og på den turen vart vêret faktisk så pass bra at eg fekk meg ein aldri så liten dukkert i sjøen. Det er einaste gongen eg har vore i sjøen denne sommaren.

– Er du ein ivrig sjøbadar?

– Ikkje no lenger, men i ungdomen var det mykje bading. No har eg vorte så pass gammal at eg vil ha ein nokolunde behageleg sjøtemperatur før eg hoppar uti.

– Men du får kanskje sjansen til meir sjøbading litt ut på haustparten.

– Ja, i haustferien til skulane skal kona og eg til Mallorca, og då vonar vi sjølvsagt på sol, varme, og eventuelt ein dukkert eller to.

Vi likar å reisa, koma oss vekk litt, og vi har planar om sydentur også i vinterferien. Sist vinter var vi på eit aldri så lite cruise mellom Egypt og Jordan, om bord på eit nokså nytt fransk cruiseskip med plass til berre kring 200 passasjerar. Det var ei flott oppleving.

– Du har ei arbeidstid som er litt utanom det vanlege?

– Ja, her er det snakk om fleksitid, flirer Olav.

– Arbeidsdagen byrjar ein gong mellom klokka halv fire og fem-seks om morgonen, og eg sluttar normalt av ein gong mellom 11–12 og fem-seks-tida om ettermiddagen. Det er køyreruta, og om vi er i Bergen og hentar mjølk, som er avgjerande for arbeidstida.

– Som storbrukar av ferje, kva synest du om det nye ferjestøet på Årsnes?

– Det har fungert bra i sommar, men eg ser fram til at vegarbeidet der inne er ferdig. Vonar berre dei gjer ein skikkeleg jobb også på resten av vegen mot Løfallstrand. Den er minst like uoversiktleg som den parsellen dei no utbetrar, samstundes som vegkantane er elendige.

– Kva gjer du på når du ikkje er på jobb og skal slappa av?

– Om vinteren ser eg litt på TV, nyhende, ein og annan film, gjerne ein actionfilm eller komedie, og dessutan dokumentar. Såpeopera skyr eg som pesten. Men på sjølvsaste 17. mai i fjor fekk vi det første barnebarnet vårt, ei lita jente, og det kjekkaste eg veit er å dulla med ho, seier Olav Ljostveit.