Auke i opplagstal hos fleire lokalaviser – så mange abonnentar auka Kvinnheringen med

2/3 av avisene som er tilslutta Landslaget for lokalaviser, aukar opplaget. Tala viser at lesarane vil ha journalistikken levert som digitale pakkar.

– Rundt 85 prosent av lokalavisene sitt opplag er no digitalt, der lesarane får lokal journalistikk og annonser både på nett og papir, skriv LLA i ei pressemelding.

I pressemeldinga kommenterer generalsekretær Tomas Bruvik i LLA dei ferske opplagstala slik:

– I ei vanskeleg tid der vi ikkje får tenkt så mykje på alt det gode arbeidet som blei gjort i lokalavisene i fjor, er det gledeleg og imponerande at 2/3 av LLA sine lokalaviser aukar opplaget. Det betyr at lokalavisene byr på journalistikk og annonser som er viktig for innbyggjarane i lokalsamfunna. Det ser vi særleg i korona-tidene. Det er avgjerande for landet å ha lokalaviser som tar samfunnsansvar, og som bidrar med livsviktig informasjon til innbyggjarane.

Kvinnheringen auka opplaget med 35 frå første til andre halvår i 2019.

Redaktør i Kvinnheringen, Mona Grønningen, seier dette om den positive opplagsutviklinga:

– Vi jobbar heile tida hardt for å laga eit viktig og godt produkt for lesarane og annonsørane våre. Vi set pris på kvar einaste ein av dei, og derfor er det veldig kjekt å sjå at opplagstalet held seg stabilt og at vi til og med har ein liten auke! Det gir motivasjon. Vi gler oss samtidig over at kollegaene i nabo-avisene våre òg har auke.

Les også

Stuntpoeten Arne Torget rører Facebook med korona-dikt