Bil hamna på jordet på Halsnøy

Vest politidistrikt registrerte åtte trafikkuhell i distriktet sitt i løpet av natt til søndag. Eitt av dei var på Halsnøy.

– Rett før midnatt rykka politiet ut til ein bil som stod på jordet ved ei rundkøyring på Halsnøy. Det var ingen i bilen då politiet kom fram, og det er litt uklart kven som har køyrd. Det såg ut som om bilføraren hadde køyrd litt fram og tilbake for å prøva å koma seg laus, fortel Knut Dahl-Michelsen, operasjonsleiar ved Vest politidistrikt.

Han seier at airbagen ikkje var utløyst, og at det ikkje er grunn til å tru at uhellet har ført med seg personskadar.

– Det er oppretta kontakt med bileigaren, og vil bli laga sak på forholdet, seier Dahl-Michelsen.

Han legg til at det er glatt ute i heile distriktet, og at folk må køyra etter forholda.