– Vi har feriert med båt sidan 1989, fortel det pensjonerte paret, Eli og Per Svindland frå Varaldsøy.

Når Kvinnheringen møter dei har dei akkurat kome frå Skudeneshavn og festivalen der, som dei skryt opp i skyene. No har dei overnatta éi natt på Borgundøy, før dei skal ta turen til Varaldsøy for å sjå til heimen før dei legg ut på ein ny båttur.

– Vi er ofte her ute på Borgundøy. Det er så utruleg sosialt. Det finst ingen andre slike plassar, det er heilt spesielt, seier Eli, og utdjupar påstanden med at det er ei så lita hamn at det blir veldig intimt, noko som gjer at alle turistane blir som ein stor familie.

– Vi har faktisk fått gode og lange vennskap ved å liggja til hamn her.

Borgundøy er ei populær ferieøy for båtturistar, og dei kjem frå fleire plassar på Vestlandet. Både rogalendingar og bergensarar tar tur til den vesle øya.

Mykje av det som gjer Borgundøy til ein heilt spesiell destinasjon for båtturistar, er folka som bur her, fortel paret.

– Dei som bur her er opne, og hjelper med det vi treng. Det blir arrangert pubkveldar kvar veke, og ein «julitrefest», i slutten av juli, seier Eli.

Då lagar eigaren av Nærbutikken julemiddag med pinnekjøt. Nissen kjem òg, og juletreet blir pynta.

– Hadde alle vore så kjekke og hjelpsame som han, ville hatt behov for å gå på NAV, seier Eli, før dei skal til å kasta loss, og nyta resten av den varme sommaren til sjøs.