Husnes Jazzklubb gler seg til å kunna presentera live musikk att. Fredag 12. november tek klubben i mot Kjetil Mulelid Trio på bar 5460 og håpar at mange finn vegen for å få med seg dette.

Dette går fram av ei pressemelding frå jazzklubben.

Kjetil Mulelid Trio sleppte debutplata «Not Nearly Enough to Buy a House» seint i 2017 på det prestisjetunge norske plateselskapet Rune Grammofon. Seinare har trioen markert seg som eitt av Norges fremste jazzband med aktiv turnering i store delar av Europa, og med det lovprisa oppfølgjar-albumet «What You Thought Was Home» som blei sleppt 30. august 2019.

Trioen har vore svært positivt omtalt i magasin som «The Wire» og «The New York City Jazz Record».

Dei tre medlemmene er nokre av dei mest interessante norske jazzmusikarane for tida, med Spellemann-vinnar Bjørn Marius Hegge på kontrabass, Spellemann-nominerte Andreas Winther på trommer, og pianist Kjetil Mulelid, kjend frå andre prosjekt som Wako og Kjemilie. Saman dannar dei ein klassisk akustisk pianotrio med fokus på Mulelid sine energiske og harmonisk rike komposisjonar med vakre melodiar, og komplekse rytmar.