Like før klokka 13 tysdag ettermiddag gjekk det eit større jordras som stengde vegen i Nordrepollen.

Vegtrafikksentralen kunne melda at vegen ikkje ville opna igjen før tidlegast onsdag, i påvente av at geologar skulle undersøka staden.

Onsdag morgon kunne trafikkoperatør i Vegtrafikksentralen, Tina Fjelladli, fortelja at det framleis ikkje var noko nytt i situasjonen.

– Vi har venta på dagslys, men no er det dårleg vêr i tillegg, noko som gjer situasjonen meir usikker. Vi har blitt lova ei tilbakemelding innan klokka 12 i dag. Før den tid veit vi ikkje noko meir.

– Skulle vore tunnel for lengst

Linn Øyre flytta frå Sunde til Nordepollen i 2002. Sjølv vaks ho opp med ein noko tryggare skuleveg enn det dei to ungane hennar har gjort.

– Når vêret er sånn som no er det ikkje eit spørsmål om det går eit ras, men når. Det er ein del av kvardagen vår, og det er med klump i magen at eg sender ungane på skule, forklarar ho.

Den yngste går på ungdomsskulen og den eldste på vidaregåande, begge i Odda. Dei kom seg ikkje heim i går etter raset, og måtte dermed overnatta hos klassekameratar.

– Det er ikkje noko stas å ikkje få ungane heim frå skulen på grunn av eit ras.

Mannen hennar, som jobbar på fiskeoppdrett utanfor Årsnes, blei skyssa heim med båt.

No er ho meir enn glad for at planlegginga av rassikring mellom Austrepollen og Nordrepollen er i gang.

– Det skulle vore tunnel her for lengst, det er det vi har sagt heilt frå starten av. Det seier seg sjølv at ein ikkje kan sikra 1000 meter fjellside rett opp. Slik det er no må vi planlegga dagane etter forholda. Eg skulle ta ein handletur til Odda i går, men avlyste det heldigvis på grunn av vêret, forklarar ho, før ho legg til:

– Det viktigaste i verda er sjølvsagt ikkje å få handla når ein vil, men at eg skal sleppa å leva med ein klump i magen når dei eg er glad i ferdast på vegane her inne. Dette raset var større enn vi er vane med.