På Voss Folkehøgskule har dei åtte forskjellige linjer, blant dei ekstremsport luft, som 19 år gamle Viljar Tveit har gått på det siste året. Han fortel om eit år med mange forskjellige aktivitetar.

Vi har stått på ski, gjort paragliding og hoppa i fallskjerm. Vi har òg klatra, stått på rullebrett, sykla mykje og surfa litt. Kvar tysdag har vi hatt seminar med førelesarar som har snakka om til dømes psykisk helse og berekraft. Vi har òg hatt noko som heiter gang-cup, det er litt som i Harry Potter, då er du på lag med dei du bur med og så er det forskjellige konkurransar, det er veldig kjekt, fortel Tveit.

– Vi hadde ein heilt fantastisk vinter! På Voss har dei gondolbane, det var som eit eventyr, eg tok berre på meg skia og sette meg på banen og så var eg midt oppe på fjellet, lengtar den eventyrlystne.

Viljar fortel at gjengen òg besøkte 16 forskjellige land i Europa under året på folkehøgskulen.

– Eg har hatt eit fantastisk år. Eg føler eg har fått ti år med opplevingar på eitt år. Det er minne eg kjem til å ha med meg heile livet.

19-åringen fortel at han sit igjen med mange nye venner og fleire nye hobbyar:

– Til dømes har eg ein venn i Lofoten. Der var eg i påsken. Då var det ski på dagtid og surfing i solnedgangen. Fekk òg oppleva Canvas Telemark då far til ei venninne eig hotellet der, smiler Viljar.

– Eg trur at eg er blitt meir open og reflektert etter dette året. Alle som går på folkehøgskule, i alle fall den linja eg gjekk, er ja-menneske og har veldig opne sinn. Kjem du med ein idé om å gjera noko er så å seia alle med. Det blir nesten teit å seia nei, svarar Tveit.

– Kva gjorde at du reiste på folkehøgskule?

– Eg ville oppleva noko eg ikkje elles får oppleva og eg tenkte det var no eller aldri. Det hastar ikkje med å begynna å jobba og eg følte eg berre måtte gjera noko, svarar Tveit.

Mange vegrar seg for å dra på folkehøgskule fordi det kostar pengar, men Viljar fortel at mykje er dekka av Lånekassen og at du får utruleg mykje for pengane. Blant anna får du plass å bu, alle måltid, og på skulen Viljar gjekk på får du òg lisens i fallskjermhopp og paragliding og mange fleire opplevingar.

Var det mest gutar på linja di?

Nei, vi var akkurat 50/50 med gutar og jenter. Alle som vil kan søka på folkehøgskule. Du skriv ein søknad akkurat som du gjer når du skal søka på ein ny jobb, svarar Tveit.

Nyleg deltok den eventyrlystne kvinnheringen på Ekstremsportveko på Voss.

– Eg var med på tre konkurransar, «switch», frikøyring og «battle of the mountain».

Dei to sistnemnde er skikonkurransar, medan «switch» er både fallskjerm, springing, sykling og paragliding.

Løpet byrjar med ein som landar med fallskjerm oppå eit fjell og vekslar med ein som skal springa. Den som spring skal vidare veksla med ein på sykkel som til sist vekslar med ein som paraglider. I denne konkurransen hadde Viljar siste etappe, altså paragliding, og fekk laget inn i mål som nummer to.