Vil skapa møteplass for flyktningar
Frå oppstartsmøtet for Møteplass for integrering, som blei arrangert før jul. Mange engasjerte folk, som ønskjer å bidra i integreringsarbeid, møtte opp. (Foto: Kvinnherad Røde Kors). Foto: Elisabeth Berg Hass
Kvinnherad Røde Kors lagar no ein arena der flyktningar og lokalbefolkninga kan bli kjent med kvarandre.
Prosjektet heiter «Møteplass for integrering», og no treng dei hjelp frå deg som vil bidra i integreringsarbeid. Alle som ønskjer informasjon om kva dei kan bidra med i høve til nyankomne kvinnheringar, eller som har idear til integreringsarbeid i Kvinnherad, er hjarteleg vel-komne til første møteplass, som er på Røde Kors-huset på Husnes onsdag kveld 27. januar. Tiltaket er planlagt med god hjelp av Kvinnherad kommune, skriv Kvinnherad Røde Kors i pressemeldinga. Adam Waiman og Rumisa Karimova frå Tsjetsjenia kjem for å fortelja om korleis dei opplevde å koma til Kvinnherad som flyktningar. I tillegg vil Vigdis Gammelsæther fortelja litt om sine erfaringar og refleksjonar frå eit delegatoppdrag for Røde Kors i Hellas, der ho jobba med flyktningsituasjonen no i jula. Det vil elles bli sett av tid til å konkretisera idear, koma med eigne ønskjer, bli kjende, og planlegga neste møteplass.
– Vi satsar på at dette blir ein arena der flyktningar og lokale elles kan koma saman for å bli kjende med kvarandre, og kanskje knyta venskapsband? Vi ser fram til å treffa dykk og gjera eit godt stykke arbeid saman! skriv Kvinnherad Røde Kors i pressemeldinga.
Har du spørsmål kan du kontakta Vigdis Gammelsæther, Elisabeth Berg Hass eller Oddrunn Steinsland. Sjekk òg Facebook-gruppa «Møteplass for integrering».
Kommentarer til denne saken