Som tidlegare skrive skulle formannskapet ha møte i Oslo i dag, torsdag. Men like før klokka 10 fortalde kommunedirektøren at politikarane reiser heim igjen.

– Vi har funne ut at det er best å utsetja formannskapsmøtet og dra heim igjen. Vi tar ikkje sjansen på å opphalda oss på flyplass eller fly, derfor har vi bestilt ein buss som tar oss tilbake over fjellet i dag, seier Ragnhild Bjerkvik.

Ho fortel elles at politikargjengen har vore den same heile vegen, og ho opplever ikkje at dei har utsett seg for meir smittefare i Oslo enn dei ville gjort i Kvinnherad.

– Men vi må gjera det vi kan gjera for å unngå smitte, som til dømes å la vera å fly. Når vi er tilbake i Kvinnherad vil vi vurdera kva tid vi kan setja opp møtet igjen. Formannskapet skal sjølvsagt ha møte, men det blir ikkje i dag, avsluttar kommunedirektøren.