Den velhaldne Colin Archer-skøyta «Ægir» av Uskedal blenkjer ikkje berre i lakk og messing der ho ligg til kai ved Husnes båthamn. No er det kome til eit nytt, blankt skilt godt synleg for den som er så heldig å koma om bord. Heidersprisen 2022 gjekk til ein båtbyggjar med sans for både kvalitet, estetikk og praktiske løysingar.

Ein fagjury på tre personar vurderte handverket og sjekka kvar minste detalj, og dei likte det dei såg.

«Ægir» er 23 år i år. Ho skjer sjøen like godt som moderne seglbåtar. Ja, det hender til og med at ho seglar forbi.

– Ho er ei vaksen dame no, men nett som ny, seier han.

– Mange trur du må arbeida deg i hel, men ho er veldig lett å halda ved like, seier båtbyggjar Egil Ersland.

Dekket smurde han for åtte år sidan. Skutesida måla han for 11 år sidan.

– Eg vaskar med vanleg grønsåpe på dekk, og bilsjampo på sidene, fortel han.

Solide saker

Egil Ersland si sjølvlaga Colin Archer lear seg ikkje når ein velvaksen journalist entrar skutesida. Men så er det ein type båt som toler det meste.

– Det er vel godt å vera på sjøen med denne?

– Ja, det er ikkje noko vêr som stoppar denne, seier han og har ei lita soge om det.

Eitt år dei var til Ålesund og skulle runda Stadt, fekk ein kompis av han motorstopp i høg sjø.

– Det var midt på kvassaste Stadt, seier Ersland.

Etter ein del mask fekk han kasta eit tau om bord, og slepet gjekk mot Florø, med til tider så stor sjø at ho som stod om bord i havaristen meiner «Ægir» forsvann ut av syne i bølgjedalane, med mast og alt.

– Eg trur kanskje ho overdreiv litt der, smiler Egil.

Neste veke løyser han og kona Sigrunn tamp, og kursen går mot sør.

Han nemner Røvær, Skudenes, Nedstrand, kanskje Lysefjorden. I fjor gjekk turen nordover til Florø og Bulandet.

– Vi har hatt mange fine turar med henne. Ho seglar veldig godt, og har ingen problem med å følgja moderne seglbåtar, og smiler ved tanken på nye båtar han har segla forbi i god driv.

Ei anna skute frå Kvinnherad som var på årets trebåtfestival og fekk heiderspris, var galeasen «Gurine» som vann klassen større fartøy.