Langfredag på Kjeldestøl

Det var folksamt under open støl på Langfredag i fjor. I år er snøen vekke, men det blir truleg minst like idyllisk ved det små sela. (Arkivfoto).

Det var folksamt under open støl på Langfredag i fjor. I år er snøen vekke, men det blir truleg minst like idyllisk ved det små sela. (Arkivfoto).

Artikkelen er over 1 år gammel

Kjeldestøl venelag gjentek suksessen frå dei to førre åra, og inviterer til open støl på fredag.

DEL

2017 var det fyrste året det vart arrangert open støl på langfredag. I det praktfulle påskevêret var det enormt med folk som tok turen, truleg godt over 300. Det vart såleis ein dag for minnebøkene. Suksessen vart gjenteken i fjor, med kring 220 personar som vitja ein stølsvoll dekka av snø. I år er snøen borte og vêrmeldingane særdeles gode.

– Budeiene er sjølvsagt til stades også denne gongen, og vil syta for lunk i omnane og ynska alle gjester og turgåarar velkomne. Dei sel også sine vidgjetne mjelkekaker, rømmegraut, kaffi og saft med meir. Vonleg vil mange nytta høvet til å sjå vakre Kjeldestøl, seier Kjeldestøl venelag i ei pressemelding.

Snart fullført

Restaureringsarbeidet på Kjeldestøl er no så å seia ferdig. Venelaget har restaurert seks sel; Bjørkesselet, Jensaselet, Monsaselet, Kristiansselet, Peraselet og Torkjellsselet. Sistnemnde manglar rett nok interiøret enn så lenge. Siriselet har vore intakt heile tida og berre blitt noko vedlikehalde. I tillegg er det sett opp både utedo og ei sjykkje. Venelaget har elles rydda fleire gamle stiar i området, ikkje minst den flotte Hauavegen som går frå Kjeldestøl til Nysetre og Hovda.

– Sela står opne, og alle er velkomne til å stikka innom for å få ei oppleving av korleis livet var på Kjeldestøl fram til 1951, som var siste sommar med stølsdrift, opplyser Kjeldestøl venelag.

For å komma deg til Kjeldestøl følgjer du vegen oppover forbi Kvinnherad kyrkje i Rosendal. Du kan parkera 100 meter etter at asfalten sluttar, og så gå inn på grusvegen i rundt 40 minuttar, før du tar av til venstre på sti merka «Kjeldestøl». Etter rundt 15 minuttar på stien er du framme.

Send tekst og bilde «

Bidra til Ditt Kvinnherad! Vi oppmodar deg til å fortelja om arrangement du skal på eller har vore på. Legg gjerne igjen foto

Artikkeltags