Inviterer til stor klesbyttedag på Husnes

Gledesspredarane er ei gruppe under Kvinnherad Frivilligsentral, med rundt 20 aktive medlemer. På laurdag arrangerer dei klesbyttedag på Husnes. Her ser du mange av jentene i gruppa då dei var frivillige under UKM. (Foto: Veronica T. Thorsen).

Gledesspredarane er ei gruppe under Kvinnherad Frivilligsentral, med rundt 20 aktive medlemer. På laurdag arrangerer dei klesbyttedag på Husnes. Her ser du mange av jentene i gruppa då dei var frivillige under UKM. (Foto: Veronica T. Thorsen).

Artikkelen er over 1 år gammel

Ungdomsgruppa Gledesspredarane lagar til «klesbyttedag» i Festsalen på Kulturhuset Husnes i morgon (laurdag).

DEL

Gledesspredarane er ei ungdomsgruppe under Kvinnherad Frivilligsentral, som ønskjer å spreia glede på ulike vis. Denne gongen ønskjer dei å ha fokus på miljøet.

– Me har alle ein del klede i skapet som anten veks eller krympar, eller som me av ein eller annan grunn ikkje brukar. Me ynskjer deg velkomen til å bytta desse kleda mot andre klede som andre av ein eller anna grunn ikkje brukar. Ein vinn-vinn situasjon; me sparer miljøet og økonomien! skriv gruppa i omtalen på Facebook.

Byttedagen blir på føremiddagen, og reglane er enkle og få. Alle som vil delta kan ta med seg opp til sju klesplagg, og levera desse til frivilligsentralen i morgon ettermiddag torsdag 5. april, eller på morgonen rett før arrangementet laurdag 7. april. Kleda må vera vaska og i god stand. For kvart plagg du leverer inn vil du få ein byttelapp som fungerer som betaling under arrangementet.

– Sjølv om all bytting skal vera gratis, vil me nytta høvet til å selja nokre lodd til inntekt for gledesspredarane sitt engasjement, og me vil ha kiosk med kaffi, kaker og digg. Så ta gjerne med kontantar! oppmodar Gledesspredarane.

Slike klesbyttedagar er tydelegvis i vinden for tida, for på tysdag kveld neste veke, 10. april, arrangerer Omvikdalen bygdekvinnelag eit liknande opplegg i Dalheim. Her kan ein levera inn maks tre plagg til vaksne, og maks ti plagg til barn.

Artikkeltags