Sommaren er i gang, og mange kvinnheringar har no tatt ferie – også nokre av dei med leiarstillingar i næringslivet. Difor har Kvinnheringen nytta høve til å stilla eit knippe leiarar nokre spørsmål. Spørsmål dei normalt ikkje får når dei er aktuelle i media.

Spørsmål

1) Kva er det luraste du har gjort i din næringslivskarriere, og er det noko spesielt du angrar på?

2) Kva dreiv du på med då du var 20, og kva var planane for livet?

3) Viss du måtte ha vore eit dyr, kva dyr ville det ha vore?

4) Kva er ditt beste ferie-tips?

5) Kva er det folk rundt deg ikkje veit om deg?

6) Ja eller nei til ananas på pizza?

7) Kva kjendis ville du hatt med på fjelltur?

Turid Lande Solheim – regiondirektør for Mowi Sør

1) Det luraste eg har gjort er å tora å ta moglegheitene då dei kom – tora å seia ja og vera utanfor komfortsona ein periode. Til dømes då eg takka ja til min første leiarjobb, eller jobben eg hadde i Mowi i Nord-Norge der eg var i tre år. Det har eg lært mykje av. I tillegg har det vore viktig for meg å «gå gradene», og byggja opp kompetanse undervegs. Elles er det ikkje noko spesielt eg angrar på. Eg har tatt stega i næringslivskarrieren i mitt tempo, og det er eg glad for.

2) Då eg var 20 studerte eg i Bergen og var vel litt i tenkjeboksen når det gjaldt retning. Eg enda opp med ei utdanning innan akvakultur, og har ikkje angra på det. Eg var heilt bestemt på at eg ville bu på bygda og ikkje i ein by. Difor såg eg på havbruk som ein fin mogleg arbeidsplass. Planane for livet då eg var 20 var vel å fullføra utdanning, etablera meg saman med kjærasten min, og ta livet som det måtte koma.

3) Eit dyr? Det hadde sikkert vore kjekt å vera ei løvinne.

4) Mitt beste feire-tips trur eg må vera å reisa til Lucca i Italia. Der har eg likt med veldig godt.

5) Det folk ikkje veit om meg er at eg er ein ekstremt dårleg tapar – det har eg arva etter mamma.

6) Ja til ananas på pizza!

7) Det var enkelt å svara på; eg ville hatt med dronning Sonja på fjelltur!

Gunnhild Nilsen Hillestad – dagleg leiar i Kvinnherad Breiband

1) Det luraste eg har gjort i min karriere er nok å takka ja til nye utfordringar. På den måten har arbeidet mitt alltid vore variert med ei bratt læringskurve. Eg har fått jobba med spanande arbeidsoppgåver, og på lag med flinke kollegaer.

2) Då er var 20 år gjekk eg på Handelshøgskulen BI i Bergen. Der studerte eg til bachelorgrad innan marknadskommunikasjon. På den tida hadde eg ein draum om å få meg jobb innan finans (bank), noko eg var så heldig at eg fekk i Skandiabanken (no Sbanken) i Bergen. Det var ein framoverlent og innovativ arbeidsplass med ungt arbeidsmiljø. Eg jobba der i fire år før eg flytta heim til vakre Kvinnherad med ei lita jente på 1 år og ein gut på veg.

3) Om eg måtte vore eit dyr ville eg vore ein fugl – tenk for ein fridom og moglegheit til å sjå mykje spanande frå lufta!

4) Dersom eg skulle gje eit ferietips så måtte det blitt Kroatia, og gjerne «øyhopping». Det er ein fantastisk fin plass som familien min har besøkt mange gonger. Elles er Kvinnherad absolutt den finaste plassen eg veit om på ein solskinsdag.

5) Som einegga tvilling så hamnar eg i ein del artige situasjonar. Det er nok mange som ikkje veit at eg er tvilling – mange gonger i månaden opplever eg at folk trur dei snakkar med tvillingen min når dei snakkar med meg.

6) Eg vil helst ikkje ha ananas på pizza, men eg er veldig glad i fersk ananas.

7) Eg ville hatt med meg Herman Flesvig på fjelltur. Han er perfekt uformell, energisk, pratsam og ein fin type. Dersom eg kunne hatt med meg to så ville eg spurt Aksel Lund Svindal òg – for ein flott og sympatisk idrettsmann.

Janne Hjelmeland – leiar i Rosendal Utvikling

1) Det luraste eg har gjort i mi næringslivskarriere var å hyra eit godt team med dyktige folk. Kjem ikkje på noko spesielt eg angrar på.

2) Då eg var 20 var eg nettopp utdanna frisør, og planla å opna frisørsalong – som eg gjorde då eg var 21.

3) Om eg skulle vore eit dyr måtte det ha vore ein trekkfugl. Då kunne eg flytta meg etter varmen.

4) Mitt beste ferietips er seglbåt-ferie i Hellas.

5) Eg er ein ganske open og utåtvendt person, så det er ikkje mykje dei næraste rundt meg ikkje veit om meg. Men dersom ein går litt lengre ut enn den næraste kretsen, så er det nok ikkje alle så veit at i mi frykt for fuglar så har eg ofra ungane mine pluss dottera til ei venninne då det kom ein fugl inni stova. Eg sprang og gøymde meg på soverommet, og lét ungane og fuglen vera igjen i stova. Heldigvis har eg flinke ungar som ordna opp og fekk fuglen ut!

– Dersom du er så redd for fuglar, kvifor ville du sjølv ha vore ein fugl då?

– He, he; om eg hadde vore ein fugl hadde eg nok ikkje vore redd meg sjølv (forhåpentlegvis).

6) Ja til ananas på pizza!

7) På fjelltur ville eg tatt med meg Petter Stordalen, ein inspirerande kar. Han hadde nok snakka heile tida, så eg kunne berre gått og nytt turen og lært masse samtidig.

Jon Ola Ystgaard – fabrikksjef Hydro Husnes

1) Sjølv er eg veldig nysgjerrig av meg, og trur det er veldig lurt å stilla «dumme» spørsmål og prøva å forstå bransjen du er i. Elles har eg vore bevisst på at det også er eit val det å seia nei, dersom nokon spør om ein vil prøva noko nytt. Eg har derimot prøvd å seia ja i dei situasjonane der eg trur eg har hatt noko å bidra med, og som har passa med livssituasjonen. Elles kan eg ikkje seia at eg angrar på noko. Det hadde vore veldig interessant å jobba i utlandet ein periode, men dei gongane eg har fått moglegheita så har det ikkje passa med familiesituasjonen.

2) Sommaren eg var 20 jobba eg i fiskeindustrien. Og då gleda eg meg veldig til å dra på interrail og deretter flytta til Trondheim for å studera. Elles var livet fritt for planar.

3) Dersom eg måtte ha vore eit dyr ville eg ha vore ein gepard. Lynrask og biff til middag kvar dag – høyrest ut som eit godt liv.

4) Mitt beste ferie-tips er å pakka bilen med diverse utstyr, og køyra etter vêret i Norge. Då har du eit paradis av moglegheiter; ein kan klatra på fjell, besøka familie, bada der det er vatn – herleg! Etter to år med feriering i Norge så reiste eg og familien til sørkysten av Frankrike. Ikkje verst det heller. God nummer to!

5) Eg kjem ikkje på noko dei rundt meg ikkje veit om meg.

6) Ja til ananas på pizza!

7) Eg trur Vladimir Putin hadde hatt godt av ein tur i den norske fjellheimen. Kanskje enkelheten og den friske fjellufta hadde fått han på betre tankar. Kor godt selskap det er veit eg ikkje, men eg hadde gitt det eit forsøk.

Les også

Tidlegare russepresidentar svarer: Kvar er dei no?