Inviterer fylkesmannen på synfaring

TOMT: Rita Handeland har flytta heim til Kvinnherad med sambuaren og ville byggja hus på slektsgarden. Her er ho saman med faren, Ingmar Handeland, på tomta der det var planlagt at huset skulle reisa seg. (Arkivfoto).

TOMT: Rita Handeland har flytta heim til Kvinnherad med sambuaren og ville byggja hus på slektsgarden. Her er ho saman med faren, Ingmar Handeland, på tomta der det var planlagt at huset skulle reisa seg. (Arkivfoto).

Ordførar Peder Sjo Slettebø har engasjert seg i saka til det unge paret som ikkje får dispensasjon til å skilja frå tomt og byggja hus på slektsgarden på Sandvoll.

DEL

Kvinnheringen skreiv i vinter om det unge paret, Rita Handeland (27) med sambuar, som har flytta heim til Kvinnherad og vil byggja hus på slektsgarden hennar på Handeland. For å få setja i gang med bygginga, måtte tomta delast frå sjølve garden. Forvaltningskomiteen i Kvinnherad kommune såg positivt på dette, då tomta er bratt og lite eigna for dyrking.

Fylkesmannen i Hordaland påklaga vedtaket, men kommunen heldt på sitt. Fylkesmannen i Rogaland blei då sett som settefylkesmann, og gjorde om vedtaket til kommunen. Ordførar Peder Sjo Slettebø har no engasjert seg i saka og invitert fylkesmannen på synfaring:

– Eg har sjølv vore på synfaring på den aktuelle garden og sett tomta Handeland søkte om å dela frå. Eg kan ikkje under noko omstende sjå at argumenta fylkesmannen nytta for å gjera om vedtaket er rimelege.

Rita Handeland og sambuaren har halde på med saka i over halvtanna år no.

– Åleine blir vi hjelpelause mot eit så stort system, så vi er veldig glade for at ordføraren engasjerer seg, seier ho.

Rita ventar no i spenning på vidare utvikling i saka, og håpar sjølvsagt på positivt svar.

– Eg er optimist og har endå ikkje godtatt avslaget. Det blir rett og slett for dumt om vi ikkje skal få byggja hus på tomta.

Folketalsnedgang

– Eg opplever, mellom anna i denne saka, at fylkesmannen ikkje er ein medspelar for distriktskommunane.

Ordføraren peiker på at Kvinnherad kommune opplever folketalsnedgang, og at det då er viktig å leggja til rette for at unge menneske med tilknyting til Kvinnherad vil flytta attende til kommunen etter ferdig studietid. Han har no invitert fylkesmannen til synfaring på tomta ved å senda brev til landbruksdirektøren, i håp om å prøva å få fylkesmannen til å vera open for dialog.

Kvinnheringen tok kontakt med saksbehandlar hos fylkesmannen, som har notert seg at landbruksdirektøren i Førde har mottatt brevet til ordføraren, men at det er for tidleg å seia noko meir om saka.

For ordens skuld vil vi opplysa lesaren om at sambuaren til Rita Handeland, Håvard Røyrvik, jobbar som journalist i Kvinnheringen. Han har ikkje vore involvert i arbeidet med artikkelen eller redaksjonen si vurdering av prosessane rundt denne.

Send tekst og bilde «

Vi vil gjerne høyra om smått og stort som går føre seg i Kvinnherad. Hjelp oss å vera overalt!

Artikkeltags