Juleshow med humor så sveitta renn

JULESHOW: Om få dagar har juleshowet premiere, og det er fortsett mogeleg å kjøpa billett. Her ser vi Grim Moberg og Karianne Solheim under førebuingane, ikledd dei vakre og tidsriktige julekleda sine.

JULESHOW: Om få dagar har juleshowet premiere, og det er fortsett mogeleg å kjøpa billett. Her ser vi Grim Moberg og Karianne Solheim under førebuingane, ikledd dei vakre og tidsriktige julekleda sine.

Artikkelen er over 1 år gammel

Med premiere på fredag, er det full rulle på scena og alle involverte øver iherdig for å gi publikum ei humor-fylt oppleving og meir til.

DEL

– Eg har høyrt at fleire trur det er utselt, men det er framleis nokre billettar att, fortel Karianne Solheim.

Lattermilde sit ho og vossingen Grim Moberg, no busett i Bergen, i sofaen og diskuterer juleshowet som snart har premiere. Showet vil gå av stabelen heile fire gonger, fredag og laurdag den siste helga i november og første helga i desember.

– Folk kan forventa seg mykje humor forkledd i nye ting, musikalske innslag og i tillegg blir det gjensyn med gode gamle figurar – gjerne i ei ny innpakning, smiler Karianne.

– Som komikar må det jo koma litt stand-up òg, legg Grim til medan han hever bryna.

Grim er ikkje som komikarar flest. I innslaga er det alltid han sjølv det går verst utover, då den største inspirasjonskjelda og «hoggestabben» forklarleg nok er mannen sjølv.

– Eg kjenner mange komikarar som gjer ein annan figur på scena for å trekka damer etterpå. Meg vil dei knapt klemma etter enda show.

– Det seier vel sitt, ler dei to.

Første samarbeid

Det er første gong Karianne og Grim har gleda av å jobba saman profesjonelt.

– Eg såg Grim under sommerrevyen på Stord for to år sidan, og blei rett og slett heilt bergtatt og tenkte «Han MÅ eg jobba med ein gong!», fortel ho.

– Og resten er historie, føyer Grim til.

Det er også første gang den pinnekjøttglade vossingen skal stå på scena i Kvinnherad, og han gler seg stort.

– Grim gir alltid alt på scena, og du kjem vel aldri av scena utan at sveitta renn? spør Karianne og vender seg til Grim.

– Ja, vi snakkar litervis her, svarar han.

– Men den personlege hygienen min er ganske bra, eg dusjar minst to gonger om dagen, held den sjølvironiske mannen fram.

– Ja, du luktar alltid godt, forsikrar Karianne.

– Eg har faktisk fire forskjellige deodorantar eg brukar, legg Grim stolt til.

Karianne bryt ut i latter og understrekar at dei har det veldig morosamt med førebuinga, og at Grim minner veldig mykje om ho sjølv:

– Han gir alt, og han er så sjølvironisk. Eg kjenner meg sjølv godt igjen i Grim. Eg trur Kvinnherad-publikummet blir veldig glad i han.


Null stress

Premierekvelden er farleg nært, men det er ikkje teikn til stress på scena.

– Det er mange dagar til fredag, smiler dei to.

Det meste er under kontroll og dei håpar dei siste finjusteringane er på plass til generalprøva på torsdag.

– Det er nokon som seier at dårleg generalprøve gir god premiere, men eg lever heller etter mottoet «god generalprøve gir god premiere», fortel Grim.

Det er ikkje vanskeleg å skjøna kvifor desse er i «showverda». Det manglar ikkje på sjølvironi og dei kan verkeleg by på seg sjølve. Saman med Nils Trygve Markhus og resten av juleshow-gjengen står dei klare for å gi publikum ein julekveld dei seint kjem til å gløyma.

Send tekst og bilde «

Vi vil gjerne høyra om smått og stort som går føre seg i Kvinnherad. Hjelp oss å vera overalt!

Artikkeltags

Kommentarer til denne saken