I Gabriel Fliflet og Ole Hamre sin fargerike musikk står leikelyst og innleving sentralt, og det meste kan skje: Rå balkantonar blir dundra ut mellom vare, nordiske moll-perler og jødiske ettertenksomheiter, norske kystmelodiar eller italienske partisansongar. Instrumenta dei to trakterer er ikkje få, blant anna trekkspel, «hamrofon», potte – og av og til tar Ole Hamre på seg steppeskoa! Ikkje rart at dei to kallar seg «sære, men populære». Dei har nemleg turnert i heile landet med musikken sin.

Fliflet/Hamre har gitt ut platene «Ivar Aasen goes Bulgaria», «Moro post mortem – live», «Gabriole» og «Eine kleine Kraftmusik». På oppdrag frå NRK1 laga dei to venene i 1996-97 TV-serien «Fliflet/Hamre Kraftakvarium».

På starten av 2000-talet innleia Fliflet/Hamre eit spennande samarbeid med gitarist Knut Reiersrud. Etter ein gjenforeiningskonsert i Oslo, har karane besøkt Voss, Hamar, Tønsberg, Bø, Porsgrunn, Bergen og Arendal, og fredag kjem dei altså til Husnes.