Stadig nærare raudgrønt samarbeid

OPTIMISTAR: Sp sin forhandlingsleiar, Benthe Bondhus (t.v.), trur  på eit samarbeid med Ap og SF. Her saman med partikollegaene Stein Olav Ølvestveit og Marianne Nordhus. Foto: Mona Grønningen

OPTIMISTAR: Sp sin forhandlingsleiar, Benthe Bondhus (t.v.), trur på eit samarbeid med Ap og SF. Her saman med partikollegaene Stein Olav Ølvestveit og Marianne Nordhus. Foto: Mona Grønningen

Partia er straks i mål med forhandlingane.

DEL

– Vi har ein fantastisk fin tone, melder forhandlingsleiaren for Senterpartiet, Benthe Bondhus.

Ho trur det er snakk om kort tid før Senterpartiet, Arbeidarpartiet og Sosialistisk Fellesliste er klare med den politiske plattforma for neste fireårsperiode.

– Har Sp også vore i forhandlingar med Høgre?

– Reelle forhandlingar har det ikkje vore, men vi har snakka med folk i partiet.

– Kan du bekrefta at det er uaktuelt å gå i nærare forhandlingar med Høgre?

– Ettersom vi har ein svært god dialog med Ap og SF, går det truleg mot eit samarbeid mellom oss tre. I samtalane har vi alle med oss respekt for og tillit til kvarandre, noko som gir det beste grunnlaget for å koma fram til gode løysingar. Men ver litt tolmodige med oss ei stund til, ber Bondhus.

Klar denne veka

Ap sin listetopp, Hilde Enstad, er endå klarare i talen.

– Vi har jobba godt og grundig med den politiske plattforma. Her er det viktig å ha vore gjennom dei fleste sakene, slik at vi unngår at samarbeidet sprekk mot slutten av perioden. No er vi nesten i mål med arbeidet, og eg kjenner meg trygg på at vi kjem i mål, truleg alt denne veka, seier Enstad.

– Kva med posisjonane, er dei klare òg?

– Hittil har vi konsentrert oss om politikken. Posisjonane tar vi etterpå.

Største partiet ute

Etter alt å døma vil altså Høgre bli halden utanfor posisjonen, trass i at dette partiet fekk størst oppslutnad i valet. Vi spør Høgre sin forhandlingsleiar, Knut Johannes Helvik, om korleis han ser på det.

– Uheldig, og kjedeleg for veljarane som seier at vi er størst. Vi har gitt ein open invitasjon til Sp om å forhandla, men ikkje fått respons på den. Heller ikkje Ap ønskjer å snakka med oss. Vi likar ikkje situasjonen partiet vårt er kome i, men vi får berre akseptera at politikk er politikk, og at det meste kan skje.

– Korleis ser du på ein koalisjon mellom Ap, Sp og SF?

– Det mest interessante er korleis Sp og Raudt kan klara å samarbeida. Avstanden mellom dei to er jo ganske stor. Skulle det skjera seg, kan det vera greitt for Sp og Ap å notera seg at H framleis er ope for dialog. Men med SF har vi lite å snakka om, seier Helvik.

Det nye kommunestyret skal konstituera seg i oktober.

Partia til Kai Morten Torget (Frp) og Knut Johannes Helvik (H) ser ut til å hamna utanfor posisjon.

Partia til Kai Morten Torget (Frp) og Knut Johannes Helvik (H) ser ut til å hamna utanfor posisjon.

Artikkeltags