Sjå kven som fekk pengar frå Sparebank 1-stiftinga utan å ha søkt

Utdelinga skjedde i Husnesparken og ingen av mottakarane hadde søkt om pengar.

– Koronapandemien har ramma lag og organisasjonar på mange måtar. Det som styret i stiftinga har sett på er at mange lag har gått glipp av inntekter frå arrangement de normalt ville ha arrangert denne våren og sommaren, innleia styreleiar i stiftinga, Svein Arne Eidsvik.

– Det er sjølvsagt mange andre lag som kunne fått støtte, men vi har plukka ut dykk denne gongen for å styrkja økonomien dykkar. Pengane de får i dag står de ganske fritt til å bruka – rett nok ikkje til straum og husleige – men til å oppretthalda aktiviteten i laga, understreka Eidsvik.

Éi av gåvene peika seg ut. I tillegg til 75.000 kroner i «korona-støtte», fekk Strand-Ulv nemleg 400.000 kroner til å gjera ferdig opprustinga av Strandulvhallen. Dermed vart det totalt delt ut 1,2 millionar kroner i denne ekstrarunden.