Gjennom prosjektet fekk elevane læra mykje forskjellig om fiskeoppdrett, alt frå fakta om laksen sin livssyklus, både som villfisk og oppdrettsfisk, og korleis den endar opp på matfata våre. Elevane laga faktaark om dette, og 12. desember fekk dei òg besøka Brødrene Hjønnevåg AS i Uskedalen for å sjå korleis matproduksjonen der føregår.

– Ein måtte ta på rein drakt for å gå inn i rein sone, og då måtte me ta på oss nokre rare klede. Det var frakk for å ikkje få bakteriar i maten, hovudplagg for å ikkje få hår i maten og blå posar på skoa for å ikkje dra inn bakteriar, skriv elevane sjølve.

I produksjonslokala fekk dei sjå lutefisk i store kar, handfiletering av fisk, isoporlager, røykeskap, kjølerom og pakkemaskinar – blant anna.

– Fiskekakene blei laga i naborommet. Der var det ei stor kvern som kutta opp fisken. Så blei fisken tatt i ei maskin som er ganske lik eltemaskina vi har heime på kjøkenet, berre veldig stor. Der blir det tilsett diverse. Så blir deigen/massen steikt. Då fer fiskekakene bortover eit rulleband, og halvvegs snur dei seg, står det vidare i teksten elevane har skrive.

Dei fekk elles med seg historia til den lokale bedrifta, og at dei 9 tilsette har mange forskjellige jobbar. Nokon jobbar på kontor, nokon pakkar varer, nokon lagar sjølve fiskekakene og fiskepuddingen, og nokon røyker fisk.

I arbeidet med fiskeprosjektet fekk elevane også prøva seg på matlaging.

– Då me besøkte Hjønnevåg fekk me god lunsj: Pitabrød med fiskekaker og grønsaker. Mange likte det godt, og hadde lyst å prøva det heime. Dagleg leiar Marit Hjønnevåg sa at me måtte finna på noko godt for ungdom, fordi at Hjønnevåg si framtid skal gå på skinner og ikkje knekkja. Hjønnevåg har mange forskjellige fiskar dei brukar i produksjonen, til dømes laks, torsk, makrell, sei, blåkveite og aure.

Elevane fann ut at laksetaco var ein god idé, og fann denne oppskrifta på Matprat.no om du òg treng middagsforslag:

INGREDIENSAR

0,75 kg laks i tynne strimlar

Kryddersaus:

0,5 ss spisskummenfrø
0,5 ss korianderfrø
1 ts paprikapulver
0,5 ts gurkemeie
0,25 ts kajennepepper
0,13 ts malt nellik
0,25 ts malt allehånde
0,25 ts malt kanel
0,25 ts kvernet pepper
0,5 ts malt kardemomme
0,5 ts salt
2 båtar finhakka kvitlauk
2 ss olje
0,25 stk. sitron
1 stor potet

Shawarma-dressing

1,5 dl gresk yoghurt
0,25 stk. lime
1 ss tahini
1,5 båtar kvitlauk
1,5 ss frisk dill
1,5 stilkar frisk mynte

Yoghurtlefser

375 gram gresk yoghurt
375 gram kveitemjøl
0,5 ts salt

Til servering
0,5 stk. agurk
0,5 boks cherrytomater, gjerne gule og raude
0,5 stk. lauk
0,25 potte frisk koriander eller mynte

SLIK GJER DU

1. Skjer laks i tynne skiver.

2. Ha spisskummen og korianderfrø i ein mortar og knus dei grovt. Ha i paprika, gurkemeie, nellik, allehånde, kanel, pepper og salt og bland godt. Tilset hakka kvitlauk og olje og kna det heile saman til ein glatt saus.

3. Pensla kvart lakseskive med kryddersausen.

4. Skrell potetene og skjer av botnen, så dei står stødig. Fest to grillspyd på toppen av kvar potet og tre lakseskivene på spyda i ca. 10 cm høgde.

5. Steik i steikeomn på 175 °C eller på grill i ca. 45 minutt, til laksen er gjennomsteikt og har ein kjernetemperatur på 70 °C.

6. Bland saman yoghurt, limesaft, tahini og kvitlauk. Hakk dill og mynte fint og bland det i dressinga. Smak til med salt og kverna pepper.

7. Bland yoghurt og det meste av kveitemjølet og salt i ein arbeidsbolle og elt det saman til ein mjuk, men ikkje klebrig deig. Tilset litt meir mjøl om nødvendig.

8. Del deigen i like store emne. Dryss mjøl på benken og kjevla ut kvart emne så tynt som mogleg (1-2 mm).

9. Steik ei og ei lefse på takke eller i tørr steikepanne. Snu lefsene når dei begynner å få brune flekkar, og steik ferdig på andre sida. Hald lefsene varme i eit reint kjøkkenhandklede.

10. Skjer laksen av spyda og fyll det i lefsene sammen med dressingen, agurk, tomat, løk og urter. Rull lefsa sammen til ein tett rull og pakk i litt matpapir.